İngiltərə premyer liqası İctimai TV-də yaymlanacaq

01 Oktyabr 2021

 Azərbaycan teleməkanında böyük tamaşaçı auditoriyasına malik, dünyanın ən baxımlı liqası sayılan İngiltərə premyer liqasının 2021/2022 mövsümünün qarşıdakı turlarının İctimai Televiziya ilə yayımlanması barədə razılıq əldə olunub.

İctimai Televiziya və Radio Yayımları Şirkətindən Heftelik.az-a verilən məlumata görə, anlaşmaya əsasən, hər turun 2 mərkəzi qarşılaşması İctimai Televiziya vasitəsilə canlı yayımda futbol azarkeşlərinə təqdim olunacaq.

Məsələ ilə bağlı telekanala ünvanlanan çoxsaylı müraciətlər, Şirkətin sosial şəbəkə hesablarının mesaj qutularına yazılan minlərlə məktub və ümumiyyətlə premyer liqa oyunlarına böyük ictimai maraq nəzərə alınaraq aparılan danışıqlar futbolsevərlər üçün sevindirici xəbərlə nəticələnib:

“Futbol həvəskarları hazırda İngiltərə premyer liqa oyunlarını ölkə ərazisində izləməklə bağlı problemlə üzləşdiyi üçün nüfuzlu idman tədbirlərinin yayımlanmasında zəngin təcrübəyə malik İctimai Televiziya azarkeşlərə növbəti sürpriz edir. Premyer Liqa ilə bağlı yayımın əldə olunmasında bizi tərəfdaş olaraq seçdiyinə görə “Saran Holdinq”ə təşəkkürümüzü bildirir və bu əməkdaşlığın hər iki qurum üçün uğurlu olacağına inanırıq”.

 Beləliklə, bu həftənin şənbə günü oktyabrın 2-si saat 15:30-da başlayacaq “Mançester Yunayted” – “Everton” oyunu ilə İngiltərə Premyer Liqası Azərbaycan teleməkanına qayıdır. Bazar günü saat 19:30-dan başlayaraq isə futbol azarkeşləri “Liverpul”-“Mançester Siti” oyununu İctimai Televiziya vasitəsilə canlı izləyə bilərlər. Xoş seyrlər! – deyə Şirkətin mətbuat xidmətinin açıqlamasında bildirilir.

Top