Azərbaycan yalnız əhalinin 40 faizinə yetəcək koronavirus vaksini alacaq - SƏBƏB

16 Yanvar 2021

“COVAX çoxtərəfli platforması üzrə əhalinin 20 faizinin - 10 faiz+10 faiz olmaqla – vaksinasiya edilməsinə dair müqaviləmiz var. Bu, 2 milyon əhali edir. “Sinovac” şirkətindən də 2 milyon əhali üçün də 4 milyon doza alınacaq”.

Heftelik.az-ın məlumatına görə, bunu Azərbaycan Respublikası Prezidentinin köməkçisi – Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov nə üçün əhalinin ən azı 60 faizi üçün vaksin sifariş edilməməsi ilə bağlı suala cavabında bildirib.

BUNA DA BAX: Azərbaycanda karantin rejimi uzadıldı, yumşalmalara başlanıldı - DETALLAR

Ş. Mövsümov deyib ki, beləliklə, əhalinin 40 faizini əhatə edəcək qədər vaksin alınacaq: “Eyni zamanda xəstələnib sağalan insanlara peyvənd vurulmur, çünki onlarda artıq immunitet var. Növbəti aylarda da yoluxanlar, sağalanlar olacaq. Ona görə də hesab edirik ki, alınan vaksin bizə kifayət edəcək”.

Qeyd edək ki, dünya təcrübəsinə əsasən, virusla mübarizədə uğur qazanmaq üçün əhalinin ən azı 60 faizində immunitet formalaşmalıdır.

Qeyd edək ki, Azərbaycana artıq vaksinin bir hissəsi gətirilib və sabahdan tibb işçilərinə peyvənd vurulmasına balanacaq. 

Top