Hündürlüyü 12 metrdən 30 metrə qədər olan müxtəlif təyinatlı tikinti obyektləri bu sinifdədir

Layihələndirmə xidmətləri üçün üçüncü sinif tikinti obyektləri məlum olub.

Heftelik.az-ın məlumatına görə, bu, Fövqəladə Hallar Nazirliyinin təsdiqlədiyi “Tikinti üçün layihələndirmə xidmətlərinin dəyərinin cari qiymətlərlə hesablanması Qaydaları”nda əksini tapıb.

Üçüncü sinif tikinti obyektləri aşağıdakılardır:

– hündürlüyü 12 metrdən 30 metrə qədər olan müxtəlif təyinatlı tikinti obyektləri;

–     sahəsi 5000 m²-dən 20 000 m²-dək olan istehsalat və anbar tikililəri;

–     taxılçılıq, heyvandarlıq, quşçuluq və südçülük komplekslərinin tərkibinə daxil olan bina və qurğular;

–     sahəsi 1 hektardan çox olan istixanalar;

–     100-dən çox avtomobil tutumlu birmərtəbəli avtomobil dayanacaqları;

–     tutumu 50 nəfərdən (şagird) çox olan məktəbəqədər təhsil müəssisələrinin binaları;

–     tutumu 200 nəfərdən 1000 nəfərə qədər (1000 nəfər daxil) olan ümumi təhsil müəssisələrinin tədris korpusları;

–     peşə, orta ixtisas və ali təhsil müəssisələrinin tədris korpuslarının binaları;

–     ümumi təhsil müəssisələrinin tutumu 800 yerdən çox olmayan yataqxana korpusları;

–     ahıllar və əlilliyi olan şəxslər üçün sosial xidmət və reabilitasiya müəssisələri;

–     xəstəxanalar, tibb məntəqələri (mərkəzləri), sanatoriyalar, dispanserlər, müalicə və ambulator poliklinika binaları;

–     1500 nəfərdən 8000 nəfərədək tamaşaçı (azarkeş) tutumu olan stadionlar və oyun meydançaları;

–     qapalı və açıq hovuzlar (ümumi istifadədə olan torpaqlarda yerləşən sututarlar və həcmi 10 milyon m3-dən artıq olan su hövzələri (anbarları) istisna olmaqla);

–     sərgi və muzey binaları;

–     sahəsi 1000 m²-dən 5000 m² qədər olan ticarət binaları, ictimai iaşə obyektləri;

–     dini sitayiş obyektləri;

–     elmi kitabxanalar, laboratoriyalar, elmi-tədqiqat, layihə-konstruktor təşkilatlarının və sınaq mərkəzlərinin binaları;

–     meliorasiya sistemləri və qurğuları (birinci, ikinci, dördüncü və beşinci siniflərə aid olanlar istisna olmaqla), balıq təsərrüfatı obyektləri;

–     paylayıcı mühəndis qurğuları (mühəndis şəbəkələri, nəqledici qurğular və resursların paylanmasını təmin edən digər bina və qurğular);

–     gücü 5 MVt-dək olan istilik elektrik stansiyaları;

–     6-10 kV-luq paylayıcı məntəqələr, 6-10/0,4 kV-luq transformator yarımstansiyaları;

–     0,4 -10 kV-luq elektrik ötürücü xətlər;

–     sahə avtomobil yolları və IV, V kateqoriyalı dəmir yolları;

–     sugötürən və suqəbuledici qurğular;

–     müvəqqəti körpülər və piyada keçidləri;

–     III, IV və V texniki dərəcəli avtomobil yolları.