“Naxçıvan Sığorta” şirkətinin rəhbərliyinə yeni təyinat olub.
Heftelik.az-ın xəbərinə görə, bu barədə şirkət məlumat yayıb.
Abbasbəyli Ayxan Nikbin oğlu “Naxçıvan Sığorta”nın İdarə Heyətinə müvəqqəti üzv seçilib.
Qeyd edək ki, Azərbaycanın yeganə regional sığorta şirkəti “Naxçıvan Sığorta” 2014-cü ildə yaradılıb və onun səhlərinin 100 %-i “Naxçıvan Bank” ASC-yə məxsusdur.
Xatırladaq ki, “Naxçıvan Bank” ASC-nin səhmdarları artıq dəyişib. “Naxçıvan Bank”ın səhmlərinin 63.66%-i Hüseyn Məmmədov, 26.52%-i Rüfət Məmmədov və 9.82%-i Binnət Novruzov tərəfindən alınıb. Binnət Novruzov həmçinin, bankın Müşahidə Şurasının sədri, Rüfət Məmmədov isə Müşahidə Şurasının üzvüdür. Bundan əvvəl bankın səhmdarları Naxçıvan MR-nın Ali Məclisinin keçmiş sədri Vasif Talıbovun ailə üzvləri olub. V.Talıbovun oğlu Rza Talıbov “Naxçıvan Bank”ın səhmlərinin 63.66%-nin, digər oğlu Seymur Talıbov 20.48%-nin, qızı Baharxanım Talıbova 9.82%-nin, xanımı Sevil Sultanova isə səhmlərin 6.04%-nin sahibi olublar. Qeyd edək ki, bu il fevralın 6-da bankın səhmdarlarının dəyişdiyi məlum olsa da, adları açıqlanmamışdı.
Beləliklə, “Naxçıvan Bank”la yanaşı, onun törəmə şirkəti “Naxçıvan Sığorta”nın da sahibləri dəyişib. Belə ki, 2014-cü ilin martında bank 100% özünə məxsus olan yerli sığorta şirkəti “Naxçıvan Sığorta”nı təsis edib və onun 100% payla sahibidir.