2 avqust saat 23:20 radələrində ADY-na məxsus elektovoz Qala-Binə mənzilində hərəkətdə olarkən dövlət qeydiyyat nişanı 77-FV-520 olan “Hyundai Elantra”markalı avtomobil dəmiryol keçidini keçməyə cəhd edib.
Azərbaycan Dəmir Yolları QSC-dən Heftelik.az-a verilən məlumata görə, maşinist tərəfindən təcili tormozlanma aparılsa da tormoz məsafəsi az olduğundan toqquşma qaçılmaz olub. Hadisə nəticəsində xəsarət almış sürücü (Rəfiyev Şəmistan Zəkəriyya oğlu ) və 1 sərnişin (1990-cı il təvəllüdlü Əşrəfova Aytəkin Sahib qızı) təcili tibbi yardım briqadasının köməyi ilə xəstəxanaya çatdırılarkən sürücü yolda dünyasını dəyişib.
ADY bir daha nəqliyyat vasitələri sürücülərini Azərbaycan Respublikasının “Yol-Hərəkəti haqqında” qanunun 44-cü maddəsinin tələblərinə ciddi riayət etməyə, dəmir yolu keçidlərinə yaxınlaşarkən yüksək sayıqlıq göstərməyə və keçidin qatardan boş olduğuna tam əmin olduqdan sonra hərəkətlərini davam etdirməyə çağırır.
Qeyd edək ki, sürücülərin yol-hərəkəti haqqında Qanunun tələblərini kobud pozması nəticəsində cari ildə keçidlərdə 18 hadisə baş verib, 6 nəfər xəsarət alıb , 3 nəfər isə dünyasını dəyişib.
Ötən ilin eyni dövrü ərzində isə dəmiryolu keçidlərində 12 hadisə baş verib, 4 nəfər xəsarət alıb, 1 nəfər isə həlak olub.
Xatırladaq ki, Аzərbаycаn Rеspublikаsının İnzibаti Хətаlаr Məcəlləsində edilmiş dəyişikliklərə əsasən dəmiryol keçidlərindən keçmə qaydalarının pozulması, nəqliyyat vasitələrinin dəmir yollarını dəmiryol keçidlərindən kənar yerlərdən keçməsinə görə sürücülərə 𝟏𝟎𝟎 𝐀𝐙𝐍 məbləğində cərimə tətbiq olunur.