Azərbaycan Həmkarlar İttifaqları Konfederasiyasının sədri Səttar Möhbalıyevə növbəti seçkilərdə deputat olmayacağı yönündə mesaj verilir.
Heftelik.az-ın “Gündəlik Naxçıvan“ -a istinadən verdiyi məlumata görə, Səttar Möhbalıyevin deputat seçildiyi Naxçıvandakı 3 saylı Babək – Kəngərli – Naxçıvan Dairə Seçki Komissiyası ləğv olunacaq.
Həmin dairədə çalışan komissiya üzvləri bildiriblər ki, bununla bağlı xəbərdarlığı Mərkəzi Seçki Komissiyasından alıblar.
Məlumata görə, adıçəkilən dairə üç yerə bölünərək, 2 saylı Şərur, 5 saylı Şahbuz – Babək, 6 saylı Culfa – Ordubad DSK-larının tərkibinə veriləcək.
3 saylı DSK, MSK-nın müəyyən etdiyi 125 dairədən biridir. Həmin dairəni hazırda deputat Səttar Möhbalıyev təmsil edir. Bu dairənin ləğv edilməsi digər yeni bir dairənin yaranmasını labüd edir. Əks halda növbəti parlament seçkilərində 124 yer uğrunda mübarizə aparılacaq.
Bu plan iş yerlərini itirəcək DSK üzvləri və digər işçilər arasında ciddi narahatlığa səbəb olub. DSK üzvü F. Məmmədov deyir ki, onlar artıq özlərinə yeni iş axtarırlar:
“Bizə deyiblər ki, DSK ləğv olunur, özünüzə iş tapın. Bu məlumat bizi çox məyus etdi. Çünki, DSK-da işləyən onlarla adam işini itirəcək. İndi iş tapmaq da çətin məsələdir. Əslində bizim DSK-da seçici sayı qanunvericiliyə uyğundur. Naxçıvanda seçici sayı az olan DSK-lar var. Onları ləğv etmək daha münasib idi. Görünən odur ki, həmin DSK sədrlərinin himayədarları daha güclüdür”.
Mərkəzi Seçki Komissiyanın adının çəkilməsini istəməyən üzvlərindən biri də deyilənləri təsdiq edib:
“3 saylı DSK-ın ləğvi ilə bağlı qərar verilməyib. Amma, ləğv olunması planda var. Müzakirələr gedir. Hələlik DSK fəaliyyətini davam etdirir. İşçilərə və üzvlərə isə dəqiq bir şey deyilməyib. Qərar verildikdən sonra onlarla bağlı yəqin ki, hansısa qərar veriləcək. Bu dairə ləğv olunarsa, onun əvəzinə Azərbaycanın başqa bir bölgəsində əlavə DSK yaradılacaq”.
Hazırda Naxçıvan Muxtar Respublikasının ərazisində cəmi 7 DSK fəaliyyət göstərir.