Təzə meyvə, tərəvəz və kökümeyvəlilərdən nümunə götürülməsinə dair tələblər müəyyənləşib.
Heftelik.az-ın məlumatına görə, bu, “Bitki və bitkiçilik məhsullarının xüsusiyyətlərindən asılı olaraq, ətraflı fitosanitar karantin baxışı və ekspertiza üçün nümunələrin götürülməsi və laboratoriyaya göndərilməsinə dair Təlimat”da əksini tapıb.
Təzə meyvə, tərəvəz və kökümeyvəlilərdən nümunə götürülməsi aşağıdakı tələblərə uyğun həyata keçirilir:
Məhsullar bağlama vahidlərində olduğu zaman nümunə olaraq nəqliyyat vasitəsinin müxtəlif hissələrindən (üst, orta, alt tərəf) aşağıdakı cədvələ uyğun sayda bağlama vahidləri götürülür:
| Partiyada olan bağlama vahidlərinin sayı, ədədlə | Götürülən bağlama vahidlərinin sayı, ədədlə |
| 50-ə qədər | 3 |
| 51-100 | 5 |
| 101-300 | 7 |
| 301-500 | 9 |
| 501-1000 | 10 |
| 1000-dən çox | 10 və hər sonrakı 100 bağlama vahidi üçün əlavə 1 bağlama vahidi |
Qalaq və dəstə halındakı məhsullardan nümunə götürülməsi zamanı tərəvəz və kökümeyvəlilər partiyasından ilkin nümunələrin formalaşdırılması üçün nəqliyyat vasitələrinin müxtəlif yerlərindən (üst, orta və alt tərəflərdən) ən azı 5 nöqtəvi nümunə götürülür. İlkin nümunənin kütləsi aşağıdakı kəmiyyət göstəricilərinə uyğun olmalıdır:
| Partiyanın kütləsi və ya partiyada olan dəstələrin ümumi sayı, ədədlə | Birgə nümunənin çəkisi və ya götürülmüş dəstələrin ümumi miqdarı |
| 200-ə qədər | 10 |
| 201-500 | 20 |
| 501-1000 | 30 |
| 1001-5000 | 60 |
| 5000-dən çox | 100 və hər sonrakı 1000 kq (ədəd) üçün əlavə10 kq (ədəd) |