Bank risk profilinə və fəaliyyət istiqamətinə adekvat olaraq likvidlik risklərinin monitorinqi üzrə prosedurlara malik olmalıdır.
Heftelik.az-ın məlumatına görə, bu, “Banklarda likvidlik riskinin idarə edilməsi Qaydası”nda əksini tapıb.
Likvidlik risklərinin monitorinqi məqsədilə ən azı aşağıdakı indikatorların izlənməsi təmin edilir:
– müxbir hesablardakı qalıqlar;
– kredit portfelinin keyfiyyəti;
– bankın qiymətli kağızlar portfeli;
– repo əməliyyatları;
– bank tərəfindən təminat qismində təqdim olunan aktivlərin girov saxlayanı, təminatların fiziki olaraq saxlanıldığı yer və mülkiyyət hüquqları;
– balans və balansdankənar əməliyyatlar üzrə əlavə vəsaitlərin cəlb olunmasına zərurət yarandıqda təminat qismində istifadə oluna bilən aktivlər;
– hər bir valyuta növü üzrə likvidlik mövqeyi;
– son illərin tendensiyaları, mövsümi amillər, faiz dərəcəsinin dəyişdirilməsinə həssaslıq və digər makroiqtisadi amillər nəzərə alınmaqla, bank tərəfindən cəlb edilmiş vəsaitlərin həcmi;
– aktiv və öhdəliklərin ödəniş müddətləri üzrə bölgüsü;
– bankın əsas öhdəlikləri üzrə kreditorların fəaliyyəti;
– öhdəliklərin növləri, əmanətçilər/kreditorlar, ödəniş müddətləri və coğrafi yerləşmə üzrə cəmləşmə;
– balansdankənar öhdəliklər;
– prudensial normativ və bankdaxili limitlərə riayət.