Dekabrın 15-də BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının – COP29-un gələn il ölkəmizdə keçirilməsi ilə əlaqədar Azərbaycan Respublikasının Prezidenti İlham Əliyevin sədrliyi ilə müşavirə keçirilib. Keçirilən müşavirə zamanı İlham Əliyev bu qərarının bütün dünya ölkələri tərəfindən bir neçə gün bundan öncə qəbul edildiyini və beləliklə, Azərbaycana növbəti dəfə böyük etimad və böyük hörmət göstərildiyini vurğulayıb o həmçinin öz nitqində apardığımız siyasətin nəticəsində dünya miqyasında çox güclü mövqelərə sahib olduğumuzu da bildirib.
O hadisənin mahiyyətini bu sözlərlə ifadə etmişdir. “Bu hadisənin önəmi, o cümlədən ondadır ki, bu qərar antiterror əməliyyatından iki ay yarım sonra qəbul olunmuşdur və beləliklə, bir daha bütün dünya ictimaiyyəti Azərbaycana öz dəstəyini ifadə etmişdir. Onu da bildirməliyəm ki, Bakıda COP29 konfransının keçirilməsi beynəlxalq aləmin hər bir üzvünün razılığı ilə mümkün olmuşdur. Yəni, burada yekdil mövqe bir daha özünü göstərdi.”
Prezidentimiz beynəlxalq birliyin Azərbaycana olan dəstəyini də vurğulamağı unutmamışdır. O nitqində qeyd edib ki, “Beynəlxalq birlik dünyanın bütün ölkələridir və bu ölkələr yekdilliklə Azərbaycana öz böyük dəstəyini göstərmişdir. Bu, birinci dəfə deyil. Biz Qoşulmama Hərəkatına dörd il ərzində uğurla sədrlik edirik və burada da bizim sədrliyimiz 120 ölkənin dəstəyi ilə mümkün olmuşdur, hətta sədrliyimiz bir il uzadılmışdır. Bu, artıq böyük bir göstərici idi. Dünyanın 120 ölkəsi Azərbaycana öz dəstəyini ifadə etmişdir. Bu dəfə isə bütün dünya ölkələri bu dəstəyi göstərmişdir.”
Ölkəmizdə keçirilməsi planlaşdırılan BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının – COP29 layihəsinin ölkəmizin xarici inkişaf və iqtisadiyyatına gətirə biləcəyi böyük faydalardan danışmamaq mümkün deyil. Prezidentimizin öz çıxışı zamanı xüsusi olaraq vurğuladığı məqamlardan biri də məhz bu məsələ olmuşdur. O COP29-un ölkələrin təmsilçiliyi nöqteyi-nəzərindən BMT Baş Assambleyasından geri qalmadığını ona görə də bütün hazırlıq işlərinə start verilməli olduğunu bildirir.
Xalidə Quluzadə
Azərbaycan Dillər Universiteti