“Space Müstəqli Teleradio Şirkəti”nin kreativ yarıdıcı qrupu yeni mövsümə ciddi şəkildə hazırlaşır.
Heftelik.az-ın məlumatına görə, sentyabr ayından etibarən tamaşaçılar həm Space TV-də, həm də 104 FM dalğasında bir sıra yeniliklərin və mühüm dəyişikliklərin şahidi olacaqlar.
Öncə onu qeyd edək ki, telekanalın bir neçə çəkiliş pavilyonu artıq tam şəkildə yenilənərək təzə verilişlər üçün hazır vəziyyətə gətirilib. Yeni mövsümdə müxtəlif formatlarda bir neçə yeni veriliş həm canlı olaraq, həm də montaj edilərək efirdə yayımlanacaq. Həmçinin telekanalımızla əməkdaşlıq etməyə başlayan yeni aparıcı simalar da qısa müddətdən sonra sevimli kanalın tamaşaçılarını sevindirəcəklər. Xüsusi olaraq bunu da qeyd etmək istəyirik ki, Space TV ölkəmizin televiziya mühitində heç vaxt mövcud olmayan bir ilkə də imza atacaq. Belə ki, ilk dəfə olaraq telekanalımızda gənc qeymerlər arasında “PUBG” onlayn multipleyer döyüş oyunu yarışları keçiriləcək.
Space radiostansiyasında da yeni mövsüm üçün hazırda ciddi işlər gedir. Artıq radiostansiyanın müəyyən qurğuları, cihazları və avadanlıqları yenilənib, efir otağında təmir işləri aparılıb. Sentyabr ayından etibarən dinləyicilər 104 FM dalğasında istər həftəiçi praym-taym saatlarında, istər gündüz saatlarında, istərsə də həftəsonlarında təzə proqramları dinləyə biləcəklər.