Prezident İlham Əliyev: “Biz öz resurslarımıza arxalanaraq güclü iqtisadiyyat qurmuşuq, müstəqil iqtisadiyyat qurmuşuq, heç kimdən asılı deyilik”
Bu gün Azərbaycan dövləti dayanıqlı iqtisadi inkişafa malikdir. Prezident İlham Əliyevin düşünülmüş siyasətinin əsasında sabitliyin qorunması dayanır. Dövlətimiz bunun sayəsində uğurlu inkişaf edib. Eyni zamanda, xalq tərəfindən dövlət başçısının siyasətinə dəstək verilir. Bu, o deməkdir ki, dövlət və xalq birliyi özünü göstərir.
Hazırda hərbi sənaye kompleksinin xüsusi olaraq inkişaf etdirilməsi, təhlükəsizliyin təmin olunması və sərhədlərin qorunması məsələsi də çox önəmlidir. Dövlətin büdcə xərcləri bu istiqamətlərdə də artırılıb. Çünki dövlətimizin təhlükəsizliyinin təmin olunması ən birinci şərtdir. Bu gün Azərbaycan təhlükəsiz, sabit bir ölkə olaraq tanınır. Ona görə də Azərbaycanda təhlükəsizliyin təmin olunmasına xüsusi fikir verilir. Prezident İlham Əliyevin cari ilin 26 sentyabr tarixində iqtisadi məsələlərə həsr olunmuş müşavirədəki çıxışında bildirdiyi kimi, gələn ilin əsas xərcləri artıq müəyyən edilib: “İlk növbədə, ölkəmizin hərbi potensialının gücləndirilməsi, təhlükəsizliyin təmin edilməsi, dövlət sərhədlərinin qorunması, hərbi sənaye kompleksinin inkişafı, təhsil xərcləri, Qarabağın və Şərqi Zəngəzurun bərpası və digər layihələr. Həm sosialyönümlü layihələr, sosial infrastrukturla bağlı olan layihələr, həm də ümumi infrastrukturla bağlı olan layihələr – bütün bunlar bizim Dövlət İnvestisiya Proqramında öz əksini tapacaq”. Artıq ərazi bütövlüyümüz tam bərpa olunub. Qarabağ ərazisində sərhədlərimiz qorunur. Yeni hərbi hissələr, postlar yaradılır və bunda da məqsəd odur ki, Azərbaycan dövləti Ermənistanla öz sərhədlərini möhkəmləndirsin və düşmənlərdən bizim sərhədlərimiz təhlükəsiz formada qorunsun.
Azərbaycan dövlətinin bütün xərcləri öz maliyyəsi hesabına həyata keçirilir. Azərbaycanın büdcəsi öz iqtisadi gəlirlər əsasında qurulur və ildən-ilə artırılır. Dövlətimizin başçısı müşavirədə Azərbaycan iqtisadiyyatının inkişaf templərinə və iqtisadiyyatın şaxələndirilməsi üçün qarşıda duran məsələlərə toxunub, büdcə xərcləri haqda danışaraq gələcək fəaliyyət planlarını qeyd edib: “İqtisadi inkişaf templəri. İqtisadi inkişaf templəri həm bu ilin sonuna qədər saxlanılacaq, həm də, – nəzərə alsaq ki, indi gələn ilin büdcəsi müzakirə olunur və büdcənin parametrləri də daha genişmiqyaslı olacaq, – gələn il də iqtisadi inkişaf templəri lazımi səviyyədə olacaq”. Bununla da Azərbaycan dövləti öz iqtisadi dayanıqlığını qoruyur və inkişaf edir. Bütün dövlətin ayaqda qalması üçün lazım olan xərcləri təmin edilir. Büdcənin artması və Azərbaycanın gələcək iqtisadi inkişafı əhalinin sosial rifahının yaxşılaşdırılmasına yönləndirilir. Cənab Prezident deyib ki, büdcə dövlətimizin imkanlarını əks etdirir: “Heç bir yerdən heç bir yardım almırıq, əksinə, xarici borcu azaldırıq. Xarici borcun ümumi daxili məhsula nisbətdə Azərbaycan dünya miqyasında qabaqcıl ölkələr sırasındadır. Bu, cəmi 7,5 faizdir və bu, bizə imkan verir ki, gələcəkdə daha az vəsaiti xarici borcun qaytarılmasına sərf edək”. Xüsusən Qarabağ və Şərqi Zəngəzurun bərpası üçün xərclər bu gün çox önəmlidir. Azərbaycanın geniş maliyyə imkanları əldə etməsi qeyd olunan sahələrə diqqətin artırılmasını zərurətə çevirib. Artıq bundan sonra yeni mühüm mərhələdə mövcud uğurların qorunub saxlanılması vacib amildir. Dövlətimiz heç bir ölkədən maliyyə almadan öz gücü ilə burada abadlıq-quruculuq işləri aparır. Artıq bu ərazilərdə yeni həyat başlayıb. Və müsbət haldır ki, bunlar hamısı müasir standartlar uyğun olaraq həyata keçirilir.
Bildiyimiz kimi, Azərbaycanın özünün iqtisadi inkişaf modeli var. Dünyada bu, nümunəvi bir model qəbul edilir. Bunun ən özəl cəhəti odur ki, Azərbaycan dövləti öz resursları hesabına iqtisadi inkişafa nail olub və ildən-ilə daha da gücləndirir. Bu baxımdan Azərbaycan iqtisadi olaraq heç bir dövlətdən asılı deyil. Nə siyasi, nə də iqtisadi olaraq Azərbaycanın asılılığı yoxdur. Prezident qeyd edib ki, artıq Azərbaycanın iqtisadi inkişaf modeli dünyada özünü təsdiqləyib: “Biz öz resurslarımıza arxalanaraq güclü iqtisadiyyat qurmuşuq, müstəqil iqtisadiyyat qurmuşuq, heç kimdən asılı deyilik. İqtisadi müstəqillik təbii olaraq bizə beynəlxalq müstəvidə böyük imkanlar qazandırır ki, Azərbaycan uğurla, inamla, şərəflə, ləyaqətlə müstəqil xarici siyasət apara bilsin. Necə ki, aparmışıq və aparacağıq”. Məhz Azərbaycanın bu iqtisadi müstəqilliyinin olması beynəlxalq aləmində də yeni bir tərəfdaşların qazanmasına imkan yaradır. Çünki beynəlxalq müstəvidə hər hansı bir ölkənin iqtisadi müstəqilliyinin olması xüsusi əhəmiyyət kəsb edir. Ona görə də Azərbaycanın ildən-ilə tərəfdaşlarının sayı çoxalır. Azərbaycan yeni-yeni qlobal layihələrdə iştirak edir. Çox müsbət haldır ki bir çox beynəlxalq layihələrdə Azərbaycan aparıcı rola malikdir. Bütün bunlar dövlətimizin iqtisadi və siyasi gücünün bariz nümunəsidir.
Zenfira Nurullayeva
Qara Qarayev adına Mərkəzi İncəsənət Məktəbinin
xor ixtisası üzrə müəllimi, Azərbaycan Respublikasının Əməkdar müəllimi