ABŞ-nin “Çikaqo Bulls” komandasının heyətində altı dəfə NBA çempionu olan əfsanəvi basketbolçu Maykl Cordana məxsus beş əşya Nyu-Yorkun “Sotheby’s”in hərracında 8,5 milyon dollara satılıb.
Heftelik.az-ın Report-a istinadən verdiyi məlumata görə, məşhur basketbolçunun çempion olduğu 1996/1997 mövsümündə geyindiyi forma 4,68 milyon dollara satılıb. 1992-ci ildə keçirilən olimpiadanın mükafatlandırma mərasimində M.Cordanın da tərkibində olduğu “Dream Team” oyunçuları tərəfindən imzalanmış ABŞ bayrağı üçün 1,8 milyon dollar ödənilib.
Onun “Çikaqo Bulls”dakı sonuncu – 1997/1998 mövsümününün pley-off mərhələsinin ilk matçında geyindiyi forma 840 min dollara, Şimali Karolina Universitetində çıxış etdiyi dövrdən məşq forması və imzalı idman ayaqqabıları 132 min dollara öz alıcısını tapıb.
Həmçinin üçüncü dəfə ən çox xal toplayan oyunçu olduğu 1988/1989 mövsümündə geyindiyi forma və şort 1,08 milyon dollara satılıb.
Qeyd edək ki, basketbolçu karyerasını 2003-cü ildə başa vurub. O, altı dəfə NBA çempionu olmaqla yanaşı, ABŞ yığmasının tərkibində 1984 və 1992-ci illərdə Olimpiya çempionu adını qazanıb.