9 – 11 dekabr tarixlərində Azərbaycan Respublikası Gənclər Fondunun maliyyə dəstəyi ilə “Yaradıcı gənclər” ictimai birliyi tərəfindən Azərbaycan Pedaqoji Universitetinin Şəki filialında “Yaşıl düşüncə – Tullantıdan sənətə” adlı layihə həyata keçirilib.
Layihənin ilk 2 günündə layihə iştirakçısı olan 30 gəncə təlimçi (sənətkar) Zahid Vələdov tərəfindən təlim (Master Klass) keçirilib. İlk olaraq layihə rəhbəri Nicat Abdulxalıqov iştirakçıları salamlayaraq, onlara layihənin məqsədi, təşkilatın fəaliyyəti haqqında məlumat verdi. Daha sonra təlimçi Zahid Vələdov çıxış edərək gənclərə müxtəlif tullantılardan hazırlanmış və ya hazırlanmasında tullantılardan da istifadə olunan sənət nümunələri – əl işləri haqqında məlumat verdi. Bir neçə əl işini və onların hazırlanma prosesini əyani şəkildə layihə istirakçılarına nümayiş etdirdi. İştirakçılar da bir neçə əl işinin hazırlanmasında iştirak etdilər.
Layihənin son günündə gənclərin əl işlərindən ibarət sərgi təşkil edildi. Sərgidə 30 – dan çox gəncin əl işləri nümayiş olundu. Stendlə iştirak edən Azərbaycan Pedaqoji Universitetinin tələbə və məzunları, Kiş kənd orta məktəbi, Oxud kənd orta məktəbinin şagirdləri, ASAN xidmətin gənc əməkdaşı sərgiyə gələn ziyarətçilərə öz əl işləri haqqında məlumat verdi. Azərbaycan Pedaqoji Universitetinin Şəki filialının rektoru Vurğun Məmmədov, Azərbaycan Gənclər Fondunun əməkdaşı Elmir Həşimli də sərgi iştirakçılarının əl işləri ilə tanış oldular. Sonda iştirakçılara sertifikatlar təqdim edildi.
