Radioavadanlıq sertifikatı, Azərbaycan Respublikasında dövlət qeydiyyatına alınmış hava gəmilərinə verilir.
Heftelik.az-ın məlumatına görə, bu, “Mülki hava gəmilərinə sertifikatların verilməsi, növ dizaynında dəyişiklik və ya onların təmiri, onların uçuşa yararlılıq və ətraf mühitin mühafizəsi üzrə tələblərin müəyyən olunması Qaydaları”nda əksini tapıb.
Sertifikatın verilməsi üçün təşkilatlar müraciət etməli və bir sıra sənədləri təqdim etməlidir. Ərizəçi hava gəmisinin məlumatlarını daxil etməli, o cümlədən istehsalçı və modellə bağlı ətraflı məlumatlar verməlidir. Hava gəmisinin radioavadanlıq siyahısı da sertifikat üçün tələb olunan sənədlər arasında yer alır. Ərizəçi əlavə olaraq Rəqəmsal İnkişaf və Nəqliyyat Nazirliyinin təsdiqnaməsini təqdim etməlidir. Hava gəmisinə əvvəllər verilmiş radioavadanlıq sertifikatları da mütləq şəkildə təqdim olunmalıdır. Həmçinin, Agentlik tərəfindən tələb edilən hər hansı digər məlumat və sənədlər də daxil edilməlidir. Təşkilat, müraciət etdikdən sonra müəyyən müddət ərzində Agentlik tərəfindən cavab almalıdır. Sertifikatın verilməsi barədə qərar, ərizəçinin sənədlərində heç bir çatışmazlıq olmadığı təqdirdə veriləcəkdir. Əks halda, ərizəçi çatışmazlıqları aradan qaldırmalıdır.