Araşdırmalar göstərir ki, əsas daşıyıcısı pişiklər olan Toxoplasma gondii paraziti insanın psixi vəziyyətinə nəzərəçarpacaq təsir göstərə bilir.
Heftelik.az Lent.az-a istinadən xəbər verir ki, mütəxəssislərin məlumatına görə, bu infeksiyanın daşıyıcıları Yer kürəsi əhalisinin 60%-ə qədərini təşkil edə bilər.
Parazit sinir sisteminə necə təsir göstərir?
Toxoplasma gondii beyində “xoşbəxtlik hormonu” kimi tanınan neyromediator dopaminin ifrazını stimullaşdırır. Onun həddindən artıq çoxluğu impulsları idarəetmə qabiliyyətini zəiflədir, aqressiya səviyyəsini artırır və riskli davranışlara meyli gücləndirir. Pişiklər parazitin əsas (son) sahibidir. Parazit onların orqanizmində çoxalır və nəcis vasitəsilə xarici mühitə düşür. Öz həyat dövrünün davam etməsi üçün T. gondii ara sahib olan gəmirici və quşların davranışını dəyişir, onları yırtıcılara qarşı doğuşdan gələn ehtiyat hissindən məhrum edir. İnsana yoluxma adətən pişik tualeti ilə təmas zamanı, həmçinin yuyulmamış meyvə-tərəvəzlərin və ya yaxşı bişməmiş ətin yeyilməsi ilə baş verir.
Yoluxma riskini necə azaltmaq olar?
Çünki xəstəlik çox vaxt simptomsuz keçir, sadə profilaktik tədbirlərə riayət etmək vacibdir:
– xam ətlə işlədikdən sonra əlləri, bıçaqları və kəsici lövhələri yaxşıca yumaq;
– əti tam termiki bişirmək;
– meyvə-tərəvəzi axar suyun altında yumaq;
– bağ işləri və pişik tualetini təmizləyərkən əlcək geyinmək;
– pasterizə olunmamış süd məhsullarından uzaq durmaq.