Sosial şəbəkələrdə Bakı şəhər Nərimanov rayonu 43 saylı orta məktəbin (MLK) şəraitinin, siniflərin, koridorun, sanitar qovşağının yararsız vəziyyətdə olduğunu əks etdirən videogörüntülər paylaşılıb. İddialara görə, direktor vəzifəsini icra edən Bakı Şəhəri üzrə Təhsil İdarəsi (BŞTİ) əməkdaşı isə valideynlərə pul yığıb sinifləri təmir etdirməyi tapşırıb, əks halda, valideynlərə bildirilib ki, yeni dərs ilində şagirdlər məktəbə buraxılmayacaq.
Heftelik.az-ın məlumatına görə, məsələ ilə bağlı Məktəb-lisey kompleksindən APA-ya bildirilib ki, təhsil müəssisəsində yeni tədris ili öncəsi valideynlərlə ənənəvi görüş keçirilib:
“Əvvəlki illərdəki ənənəyə uyğun olaraq tədris korpusu dəyişən VI və VII sinif şagirdlərinin valideynləri övladlarının təhsil alacağı korpusla tanış olublar. Valideynlər həmin tədris korpusunun durumu ilə bağlı rəylərini bildiriblər.
Məktəb rəhbərliyi tərəfindən həmin valideynlərə bildirilib ki, bu korpusun təmiri üçün aidiyyəti üzrə müraciət olunub.
Bununla bağlı valideynlərdən vəsait tələb olunmasına dair iddialar tamamilə əsassızdır.
Pedaqoji kollektivin əsas məqsədi yeni dərs ilində məktəbimizdə daha səmərəli təhsil mühitinin formalaşmasına və qarşılıqlı etimada əsaslanan münasibətlərin yaradılmasına nail olmaqdan ibarətdir”.
BŞTİ-dən bildirilib ki, Bakı şəhəri Məktəb-Lisey Kompleksinin fəaliyyəti Bakı Şəhəri üzrə Təhsil İdarəsi tərəfindən nəzarətdə saxlanılır:
“Qeyd edək ki, yeni dərs ilinə hazırlıq çərçivəsində təhsil müəssisələrinin infrastruktur və digər istiqamətlər üzrə ehtiyacları müəyyənləşdirilib və müvafiq tədbirlərin görülməsi məsələsinə baxılır”.