Azərbaycan Milli Elmlər Akademiyasının (AMEA) 80 illik yubileyi münasibətilə keçirilən yığıncaq ölkəmizin elmi-intellektual tarixində mühüm hadisə kimi qiymətləndirilir. Bu tədbirdə Azərbaycan Respublikasının Prezidenti cənab İlham Əliyevin çıxışı həm elmin inkişafına dövlət səviyyəsində verilən diqqətin, həm də alimlərimizin qarşısında duran yeni vəzifələrin aydın göstəricisidir.
Prezident İlham Əliyev çıxışında qeyd etdi ki, Azərbaycan elmi 80 il ərzində böyük inkişaf yolu keçib və bu illər ərzində müxtəlif ictimai-siyasi sistemlərdə belə, dövlətimiz elmə daim qayğı ilə yanaşıb. Ulu Öndər Heydər Əliyevin hələ ötən əsrin 70-ci illərindən başlayaraq həyata keçirdiyi elm siyasəti bu sahənin müstəqillik dövründə də əsas istiqamətini müəyyən edib. Məhz onun təşəbbüsü sayəsində yüz minlərlə azərbaycanlı gəncin dünyanın aparıcı ali məktəblərində təhsil alması ölkəmizin intellektual potensialını formalaşdırıb.
Prezident vurğuladı ki, bu gün Azərbaycan elminə ayrılan vəsait, yaradılan şərait və qəbul olunan dövlət proqramları elmi fəaliyyətin keyfiyyətini yüksəltməkdə mühüm rol oynayır. Eyni zamanda, elmin iqtisadiyyat və sənaye ilə sıx inteqrasiyası əsas prioritet kimi müəyyənləşdirilib. Dövlət başçısının sözlərinə əsasən, artıq müasir dünyanın inkişafını təbii resurslar deyil, məhz intellektual potensial və texnoloji yeniliklər müəyyən edir. Bu baxımdan Azərbaycan alimlərinin üzərinə süni intellekt, rəqəmsallaşma, kibertəhlükəsizlik, bərpaolunan enerji və hərbi texnologiyalar kimi sahələrdə böyük məsuliyyət düşür.
Cənab İlham Əliyev həmçinin elm adamlarını Qarabağ və Şərqi Zəngəzurda aparılan geoloji tədqiqatlara, ölkə tarixinin öyrənilməsinə və Azərbaycan dilinin saflığının qorunmasına fəal şəkildə qoşulmağa çağırdı. Onun fikrincə, elmin yalnız nəzəri deyil, həm də praktik nəticələr verməsi, yəni həyat və iqtisadiyyatda tətbiq olunması vacib şərtdir.
Bu çıxış bir daha göstərdi ki, Azərbaycan elminin qarşısında yeni bir mərhələ açılır-texnoloji müstəqillik, elmi innovasiyalar və milli kimliyin elmi əsaslarla möhkəmləndirilməsi mərhələsi. Dövlətin elmə göstərdiyi diqqət, alimlərin isə öz biliyini və yaradıcılığını vətənin inkişafına yönəltmək əzmi ölkəmizin gələcək uğurlarının təməlini təşkil edəcək.
Azərbaycan alimləri bu etimadı doğruldacaq, müstəqil və güclü dövlətimizin hərtərəfli inkişafında elmin aparıcı rolunu daha da möhkəmləndirəcəklər. Elm bizim sabahımızın təminatıdır və bu sabah, Prezidentin də dediyi kimi, intellektual güc, yenilikçi düşüncə və milli məsuliyyət üzərində qurulacaq.
Rəvanə Kərimova
Nəsimi Rayon Gənci