Sabahdan müvafiq il üzrə orta aylıq muzdlu işçi sayı 3 nəfərdən az olan və məcburi dövlət sosial sığorta haqları üzrə borcu olan mikro sahibkarlıq subyekti olan fərdi sahibkarların sahibkarlıq fəaliyyətindən gəlirlərinin 75 faizinə tətbiq olunan vergi güzəşti ləğv olunur.
Heftelik.az-ın məlumatına görə, bu, Vergi Məcəlləsinə dəyişiklikdə əksini tapıb.
Bundan əvvəl qüvvədə olan qanuna əsasən, gəlirlərin və xərclərin uçotunu aparan mikro sahibkarlıq subyekti olan fərdi sahibkarların sahibkarlıq fəaliyyətindən gəlirinin 75 faizi gəlir vergisindən azad idi. Dəyişikliyə görə, gələn il yanvarın 1-dən yalnız müvafiq il üzrə orta aylıq muzdlu işçi sayı 3 nəfərdən az olmayan və məcburi dövlət sosial sığorta haqları üzrə borcu olmayan mikro sahibkarlıq subyekti olan fərdi sahibkarların sahibkarlıq fəaliyyətindən gəlirlərinin 75 faizi gəlir vergisindən azad olacaq. Müvafiq il üzrə orta aylıq muzdlu işçi sayı təqvim ili ərzində muzdlu işçilərin sayının cəmlənərək 12-yə bölünməsi yolu ilə müəyyən ediləcək.
Başqa sözlə, gəlirlərinin 5 faizi qədər gəlir vergisi verən 3 işçisi olmayan mikro sahibkarlar artıq gəlirlərinin 20 faizi həcmində gəlir vergisi verəcək.
Vergi ödəyicisi vergi güzəştinin tətbiqi məqsədilə bu maddədə müəyyən edilən şərtə cavab vermədikdə və növbəti hesabat ilində mikro sahibkarlıq siyasətindən digər kateqoriya sahibkarlıq subyektinə keçdikdə fərdi sahibkarın mikro sahibkar olduğu əvvəlki 3 təqvim ilinin yekunlarına görə hesablanmış və ödənilmiş gəlir vergisinin 75 faizi həcmində vergi güzəşti müəyyən edilməklə digər sahibkarlıq subyekti olduğu dövrdə gəlir vergisi öhdəliyindən çıxılacaq.
Həmçinin qeyd olunan vergi güzəşti vergi ödəyicisi tərəfindən əmtəəsiz əməliyyatlar aparıldığı halda əmtəəsiz əməliyyatlardan yaranan gəlirlərə münasibətdə tətbiq edilməyəcək.
Bu Qanun 2024-cü il yanvarın 1-dən qüvvəyə minir.