Bəzən bir insan haqqında yazmaq üçün onun tutduğu vəzifəni, işlədiyi müəssisələri və topladığı diplomları sadalamaq kifayət etmir. Çünki elə insanlar var ki, onların peşəkar fəaliyyətinin arxasında sadəcə təhsil, bilik və təcrübə deyil, həm də insanlara münasibət dayanır. Həkimlik isə bəlkə də insan amilinin ən çox ön plana çıxdığı peşələrdən biridir.
Həkim üçün bilik, təcrübə və peşəkarlıq vacibdir. Amma xəstənin qarşısında dayananda bütün bunlara bir keyfiyyət də əlavə olunur – mərhəmət.
Redaksiyamıza müraciət edən bir pasiyentin haqqında böyük hörmət və minnətdarlıqla danışdığı həkim – Pəri Rüstəmova da məhz belə həkimlərdəndir.
Pasiyentin sözlərindən görünür ki, onun Pəri həkimə münasibəti yalnız tibbi xidmət alan insanın öz həkiminə münasibəti deyil. Burada illər ərzində formalaşmış etimad, diqqət və insani münasibətdən doğan xüsusi bir minnətdarlıq var.
“10 ildən bəri şəkərli diabet xəstəsi kimi doğmalarımdan görmədiyim qayğını Pəri həkimdən görmüşəm”, – deyə pasiyent redaksiyamıza yazdığı məktubda bildirir.
Bu cümlənin arxasında bir xəstənin illər ərzində yaşadığı çətinliklər, həkim axtarışları və ən əsası, özünü etibar edə biləcəyi bir insanın yanında hiss etməsi dayanır.
Pəri Rüstəmovanın həkimlik yolu isə təsadüfi seçimdən çox, məqsədyönlü şəkildə qurulmuş peşəkar yol təsiri bağışlayır.
O, 2008-ci ildə orta məktəbi əla qiymətlərlə bitirib. Məktəb illərində hər il fənn olimpiadalarında iştirak edib, uğurlar qazanıb və dəfələrlə təşəkkürnamələrlə təltif olunub.
Həmin il Azərbaycan Tibb Universitetinin Müalicə fakültəsinə 665 balla qəbul olunması da onun tibb sahəsinə təsadüfi gəlmədiyini göstərir.
2014-cü ildə universiteti bitirən Pəri Rüstəmova həkimlik fəaliyyətinin ilk mərhələsində nəzəri biliklə kifayətlənməyib, praktiki təcrübəyə də xüsusi əhəmiyyət verib. Tələbəlik illərində indiki 1 saylı Kliniki Tibbi Mərkəzdə iki il tibb bacısı kimi çalışaraq tibbi mühitdə praktik təcrübə toplayıb.
Universiteti bitirdiyi 2014-cü ildə Bakı Sağlamlıq Mərkəzinin endokrinologiya ixtisası üzrə rezidenturasına qəbul olunub. 2018-ci ilə qədər burada həm təhsilini davam etdirib, həm işləyib, həm praktiki təcrübə toplayıb, həm də təcrübəli həkimlərin yanında rotasiyalarda iştirak edib.
Rezidenturanı başa vurduqdan sonra keçirilən imtahanda 100 mümkün baldan 95 bal toplaması onun hazırlıq səviyyəsinin göstəricilərindən biri olub.
2018-ci ildə Pəri Rüstəmova həkim-endokrinoloq kimi Pirallahı Tibb Mərkəzinə təyin olunub. 2022-ci ilə qədər həmin tibb müəssisəsinin poliklinika şöbəsində fəaliyyət göstərib.
2022-ci ildən isə Suraxanı Tibb Mərkəzinin poliklinika şöbəsində həkim-endokrinoloq kimi çalışıb.
Bir neçə ay əvvəl isə Pəri həkim öz ərizəsi ilə dövlət tibb müəssisəsində fəaliyyətini dayandıraraq özəl tibb sektorunda işləmək qərarına gəlib. Hazırda “Aysmed” klinikasında həkim-endokrinoloq kimi fəaliyyət göstərir.
Onun dövlət tibb müəssisəsindən ayrılması isə ən azı bir pasiyent üçün asan qarşılanmayıb.
Redaksiyamıza məktub göndərən pasiyent Pəri həkimin əvvəlki iş yerindən ayrılmasına görə təəssüfləndiyini bildirərək yazır: “Mənim isə bundan sonra ödənişli xəstəxanaya getmək imkanım yoxdur. Yəni çox güman ki, bir daha həkim-pasiyent olaraq qarşılaşmayacağıq. Amma mən istəyirəm ki, Pəri xanımın xəstələrə göstərdiyi qayğı və mərhəmət bütün həkimlərə bir nümunə olsun”.
Əslində, bu sözlər bir həkim üçün ən böyük mükafatlardan biridir və bəlkə də birincisidir.
Çünki həkimin fəaliyyətini yalnız diplomları, topladığı ballar və işlədiyi müəssisələrin siyahısı ilə ölçmək mümkün deyil. Həkimin əsl qiyməti bəzən illər sonra xəstəsinin yaddaşında qalan münasibətlə ölçülür.
Pəri həkim haqqında danışan pasiyent də məhz bunu vurğulayır. Onun sözlərinə görə, Pəri Rüstəmova həm savadı və qabiliyyəti, həm də qayğıkeşliyi və mərhəməti ilə pasiyentlərinin rəğbətini qazanıb.
“Pəri həkim daha yüksək zirvələrə layiq peşəkar mütəxəssisdir, qayğıkeş və diqqətli həkimdir. Onun təcrübəsi bütün Azərbaycanın tibb işçilərinə örnək və nümunə olmalıdır”, – deyə pasiyent qeyd edir.
Bəlkə də yaxşı həkimi yaxşı həkim edən əsas xüsusiyyətlərdən biri budur: xəstə onun qəbulundan çıxanda yalnız müalicə aldığı üçün deyil, həm də dinlənildiyini, başa düşüldüyünü və insan kimi dəyər gördüyünü hiss edir.
Xüsusilə şəkərli diabet kimi uzunmüddətli tibbi nəzarət tələb edən xəstəliklər zamanı həkim-pasiyent münasibətlərində etimadın nə qədər mühüm olduğunu xəstəliyi yaşayan insanlar yaxşı bilir. Belə xəstələr üçün həkim yalnız müayinə aparan və müalicə təyin edən mütəxəssis deyil, uzun illər ərzində yanında olan, vəziyyətini izləyən və çətin məqamlarda ona dayaq olan insandır.
Pəri Rüstəmovanın haqqında redaksiyamıza daxil olan məktub da məhz belə bir münasibətin ifadəsidir.
Bu yazı hər hansı mükafatın təqdimatı deyil. Sadəcə bir pasiyentin öz həkiminə təşəkkür etmək istəyidir. Amma bəzən bir insanın ürəkdən dediyi “təşəkkür edirəm” sözü uzun illər ərzində toplanmış diplomlardan, sertifikatlardan və fəxri adlardan daha böyük qiymət ola bilər.
Tibbə biliklə gəlmək mümkündür. Peşəkar olmaq üçün illərlə oxumaq, çalışmaq və təcrübə toplamaq lazımdır. Amma yaxşı həkim olmaq üçün bunlarla yanaşı, insanı insan kimi görmək, onun ağrısını anlamaq və xəstəyə qayğı göstərmək də lazımdır.
Pəri Rüstəmovanın peşəkar yolu və pasiyentinin onun haqqında söylədiyi sözlər göstərir ki, həkimlik yalnız bir ixtisas deyil, həm də böyük məsuliyyətdir.
Belə həkimlərin əməyinin qiymətləndirilməsi, onların peşəkar fəaliyyətinin və insanlara münasibətinin nümunə kimi göstərilməsi vacibdir. Çünki səhiyyənin gücü yalnız müasir avadanlıqda, yeni texnologiyalarda və dərmanlarda deyil. Səhiyyənin ən böyük gücü insan sağlamlığını etibar etdiyi əllərə əmanət edən pasiyentin həmin əllərə güvənməsindədir.
Pəri həkimə isə yeni iş yerində uğurlar arzulayırıq. Arzu edirik ki, onun peşəkar biliyi, həkim məsuliyyəti, diqqəti və mərhəməti bundan sonra da neçə-neçə insanın sağlamlığına və həyatına xidmət etsin.
Akif NƏSİRLİ