Emmanuel Makron Fransa Prezidenti kimi fəaliyyət göstərdiyi son yay tətili üçün Fransız Rivierasını seçdi. Fransadakı isti hava dalğasından əziyyət çəkən fransız lider tətil zamanı əylənərkən fotoqrafların obyektivinə tuş gəldi. Hidrosiklin üzərində üzündə böyük təbəssümlə dənizdən zövq alan Makronun görüntüləri Fransada hiddətə səbəb oldu.
Fransadakı müxalifət Makronun gizli şəkildə çəkilmiş fotoşəkillərini sərt tənqid etdi. Fransanın tarixində ən intensiv yanğın mövsümlərindən birinin yaşandığı bir vaxtda Prezidentin vaxtını tətil etməklə keçirməsi hökumətin xalqın problemləri ilə maraqlanmadığı barədə fikirlərə səbəb oldu.
Gələn il vəzifəsini təhvil verəcək Makronun komandası fotoşəkillərin icazəsiz çəkildiyini bildirdi. Laqeydlik, məsuliyyətsizlik və vəzifəsini düzgün yerinə yetirməmə ilə bağlı tənqidlərə cavab verməyən Makronun köməkçiləri fotoşəkilləri yayımlayan Paris Match jurnalına etiraz etdilər.
“Hakimiyyətdə son yayı”
Paris Match Makronun gələn il ikinci və son prezidentlik müddətinin başa çatacağına istinad edərək “Son yayında nəzarəti ələ aldı” başlığından istifadə etdi. Jurnal Fransada ard-arda baş verən isti hava dalğaları və meşə yanğınlarının damğasını vurduğu bir yayda Makronun foil-sörfinq kimi su idmanları ilə məşğul olarkən çəkilmiş fotoşəkillərinə də yer verdi.
48 yaşlı Makron xilasedici jilet geyinmiş halda Fort de Brégançondakı tətilində olduqca idmançı görüntü nümayiş etdirdi.
Makronun yaxın çevrəsindən bir vəzifəli şəxs fotoşəkillərin icazəsiz çəkildiyini bildirərək, “Son 9 ildir hər il Prezidentin icazəsiz çəkilmiş fotoşəkilləri yayımlanır”, — dedi.
Le Monde qəzetinin xəbərində “Makronun tətil görüntülərinin iqlim böhranı və təbii fəlakətlərlə mübarizə aparan ölkədə Fransa Prezidentinin prioritetlərini sual altına aldığı” qeyd edildi.
“Qiyamət kimi bir yay… Amma Makron öz reklamı ilə məşğuldur”
Yaşıllar Partiyasının lideri Marine Tondelier fransız xalqının “qiyamət kimi bir yay” keçirdiyini bildirərək, “Amma Prezident özünə tətil reklamı etdirməklə məşğuldur”, — dedi.
Tondelier jurnalın fotoşəkillərini “beş isti hava dalğası, quraqlıq və tarixi yanğınların səbəb olduğu ölümlərlə” müqayisə etdi.
Sosialist lider Olivier Faure isə Makronun yanlış mesaj verdiyini bildirərək belə dedi:
“İsti hava dalğası zamanı, Fransa yanarkən və bir çox fransız tətilə gedə bilmədiyi halda Prezident Breqanconda hidrosikllə əylənir.”
Makron “xalqdan qopub”
Kommunist senator Pierre Ouzoulias fotoşəkilləri “yersiz” adlandıraraq, “(Makronu) yanğınları söndürən yanğınsöndürənlərə kömək edərkən görməyə üstünlük verərdim. Onun olması lazım olan yer orası idi”, — ifadələrini işlətdi.
Ouzoulias əlavə etdi: “Yaşadığımız bu yaydan sonra Prezidentin tətildə olduğunu göstərmək xalqın geniş yayılmış narahatlıq səviyyəsi ilə uyğun gəlmir.”
Jurnal Makronun tətil proqramında boks və qaçış kimi fəaliyyətlərin də yer aldığını bildirdi. Müxalifət Prezidentin xalqın üzləşdiyi çətinliklərdən uzaq olduğunu vurğuladı.