ABŞ Prezidenti Donald Tramp İrana qarşı iqtisadi təzyiqi daha da artırmaq niyyətindədir.
Heftelik.az Reuters-ə istinadən xəbər verir ki, ABŞ maliyyə naziri Skott Bessent də Vaşinqtonun Tehrana qarşı gələn həftədən etibarən “indiyədək görünməmiş” tədbirlər tətbiq edə biləcəyini deyib.
ABŞ son aylarda İranın enerji, maliyyə və dəniz daşımaları sektoruna qarşı sanksiyaları genişləndirib.
Məlumata görə, növbəti mərhələdə əsas hədəflərdən biri İran neftini alan Çinin müstəqil neft emalı zavodları ola bilər. Bundan başqa, İranla maliyyə əməliyyatlarında iştirak etdiyi iddia olunan Çin banklarına qarşı ikinci dərəcəli sanksiyaların tətbiqi də nəzərdən keçirilə bilər.
Vaşinqton həmçinin İranın sanksiyalardan yayınmasına kömək edən şirkətləri, neft daşıyıcılarını, valyuta mübadiləsi şəbəkələrini və aviasiya sektorunu daha sərt şəkildə hədəfə ala bilər.
Daha sərt variantlar arasında İranla quru sərhədi olan ölkələrin iştirakı ilə quru blokadası da müzakirə olunur. Bu halda İraq, Türkiyə, Pakistan, Azərbaycan, Ermənistan, Türkmənistan və Əfqanıstan kimi ölkələrin mövqeyi mühüm rol oynaya bilər. Ekspertlər isə belə bir addımın həm həyata keçirilməsinin çətin, həm də İran əhalisinə ciddi təsir göstərə biləcəyini bildirirlər.
Tramp administrasiyasının digər variantı İranla ticarət edən ölkələrə qarşı əlavə tariflər tətbiq etməkdir. Bunun üçün isə ABŞ Konqresində müvafiq hüquqi mexanizmlərin qəbul edilməsi tələb olunur.