ABŞ mətbuatında yer alan iddiaya görə, iranlı agentlər Netanyahu-nun oğlu Yair Netanyahu-nu Mayamidə izləyiblər. İsrailin xəbərdarlığından sonra Yair Netanyahu-nun əşyalarını belə götürmədən ABŞ-dən ayrıldığı iddia olunub.
ABŞ-ın təhlükəsizlik mənbələrinə istinad edən ABŞ mərkəzli Newsmax kanalının yaydığı xəbərə görə, İsrail kəşfiyyatı Baş nazir Binyamin Netanyahu-nun oğlu Yair Netanyahuya qarşı olduğu iddia edilən İran sui-qəsd planını ötən ilin sonlarında müəyyən edib. İddiaya görə, iranlı agentlər 35 yaşlı Yair Netanyahu-nun Floridadakı yaşayış yerini və hərəkətlərini izləyiblər.
İsrail kəşfiyyatı sui-qəsd planını müəyyən edib
Xəbərdə İsrail kəşfiyyatının 2025-ci ilin dekabrında Yair Netanyahu-nu hədəf alan sui-qəsd planından xəbərdar olduğu iddia edilib.
İddiaya görə, iranlı agentlər Mayami bölgəsində əməliyyat xarakterli fəaliyyət həyata keçirərək Yair Netanyahu-nun qaldığı yaşayış yerini və gündəlik hərəkətlərini izləyiblər. Yair Netanyahu-nun Floridanın Hallandeyl-Biç bölgəsində yaşadığı bildirilib.
İsrail kəşfiyyatının ABŞ rəsmilərini vəziyyətdən xəbərdar etdiyi və Yair Netanyahu-nun Mayamidən dərhal ayrılmasının istəndiyi qeyd olunub. Bunun ardınca Netanyahu-nun oğlunun əşyalarını belə götürmədən təcili şəkildə İsrailə qayıtdığı iddia edilib.
Netanyahu: Oğullarımdan biri İranın hədəfindədir
İsrailin Baş naziri Binyamin Netanyahu avqustun 24-də İsrailin Kanal 14 telekanalına verdiyi müsahibədə oğullarından birinin İranın hədəfi olduğunu bildirib, lakin hansı oğlunun hədəfə alındığını açıqlamayıb.
İsrailin Kanal 12 telekanalı isə sui-qəsd iddiasının media qurumlarına aylardır məlum olduğunu, lakin İsrail hərbi senzura qurumunun qadağası səbəbindən bunun daha əvvəl ictimaiyyətə açıqlanmadığını bildirib.
Netanyahu ailəsinin mühafizəsi yenidən gündəmdə
Sui-qəsd iddiası Netanyahu ailəsinə yönəlik təhlükəsizlik xərcləri və dövlət imkanları hesabına təmin edilən mühafizənin İsrail ictimaiyyətində müzakirə olunduğu bir dövrdə gündəmə gəlib.
İsrail rəhbərliyi iyul ayında Netanyahu-nun həyat yoldaşı Sara Netanyahu və oğulları Yair və Avnerə yönəlik Şin Bet mühafizəsinin müddətinin uzadılmasına qərar vermişdi.
“Ölüm təhdidləri” səbəbindən ABŞ-a köçmüşdü
Yair Netanyahu 2025-ci ildə müxalifət tərəfdarı etirazçıların ona qarşı “ölüm təhdidləri” səsləndirməsi səbəbindən ölkəni tərk edərək ABŞ-a köçdüyünü iddia etmişdi.
TOV xəbər platformasına müsahibə verən Netanyahu Baş nazir Netanyahu-nun keçmiş müdafiə naziri Yoav Qallantı vəzifədən azad etdiyi gecə özünə qarşı ölüm təhdidləri səbəbindən ABŞ-da məskunlaşmaq qərarına gəldiyini söyləmişdi. Yair Qallantın vəzifədən azad edilməsinə etiraz edən nümayişçilərin evinin qarşısına toplandığını, əllərində məşəllər olan bəzi etirazçıların evin hasarına çıxmağa çalışdığını, lakin polisin müdaxilə etmədiyini iddia etmişdi.
Vergidən yayınmaq üçün saxta addan istifadə etmişdi
Yair Netanyahu-nun vergi tutulması ilə bağlı sənədlərdə Yonatan Hon adından istifadə etdiyi müəyyən edilib. Həmçinin Yair Netanyahu-nun sənədlərdə “Balfour 0” kimi göstərilən uydurma ünvandan istifadə etdiyi qeyd olunub.
Yair Netanyahu daha əvvəl sosial mediada özünü “Yair Hon” kimi təqdim edib. “Hon” onun anası Sara-nın atası Şmuelin əsl soyadı olub; ailə sonradan soyadını Ben Artzi olaraq dəyişdirib.