Astronomlar Yerdən 12,5 milyard işıq ilindən daha uzaqda yerləşən qədim qalaktikada eyni vaxtda fəal olan üç qara dəlik aşkar ediblər. Tapıntı kainatın ilkin dövrlərində qalaktikaların necə inkişaf etdiyinin öyrənilməsi baxımından maraq doğurub.
Heftelik.az xəbər verir ki, bu barədə “ScienceDaily” elmi araşdırmanın nəticələrinə istinadən məlumat yayıb.
Tədqiqatçılar müəyyən ediblər ki, qara dəliklərdən ikisi arasında təxminən 620 işıq ili məsafə var. Astronomik miqyasda bu, xüsusilə belə nəhəng obyektlər üçün diqqətçəkən yaxınlıq hesab olunur.
Üç qara dəliyin eyni qalaktikada maddə udaraq aktivlik nümayiş etdirməsi erkən kainatda qalaktikaların birləşməsi və böyüməsi proseslərinin düşündüyümüzdən daha mürəkkəb ola biləcəyini göstərir.
Alimlər bu sistemin gələcək müşahidələrinin superkütləli qara dəliklərin yaranması ilə bağlı nəzəriyyələri dəqiqləşdirməyə kömək edəcəyini düşünürlər.